ប៉ៃលិន៖ អភិបាលខេត្តប៉ៃលិន លោកស្រី បាន ស្រីមុំ អំពាវនាវដល់ប្រជាពលរដ្ឋក្នុងខេត្តមានការប្រុងប្រយ័ត្នខ្ពស់ចំពោះទឹកជំនន់ និងបានបញ្ជាដល់អាជ្ញាធរត្រៀមក្នុងការជួយសង្គ្រោះពលរដ្ឋប្រសិនមានទឹកជំនន់កើតឡើង។

លោកស្រី បាន ស្រីមុំ បានថ្លែងក្នុងពេលចុះពិនិត្យ ស្ថានភាព ទឹកជំនន់ទឹកភ្លៀង នៅក្នុងភូមិសាស្រ្តខេត្តប៉ៃលិនកាលពីថ្ងៃទី១៥ ខែតុលា ម្សិលមិញថា ទឹកភ្លៀងដែលបានធ្លាក់នៅថ្ងៃទី១៤-១៥ ខែតុលា ឆ្នាំ២០២១នេះ និងបរិមាណទឹកនៅផ្នែកខាងលើមានសភាពហូរខ្លាំងបានបង្កឲ្យមានជំនន់ហូរចាក់ចូលទៅក្នុងភូមិសាស្រ្តផ្នែកខាងក្រោម ជាពិសេសភូមិសាស្ត្រស្រុកសាលាក្រៅដែលជាតំបន់ទំនាប។

លោកស្រីបានជំរុញដល់ពលរដ្ឋបង្កើនការប្រុងប្រយ័ត្ន ដោយត្រៀមស្វែងរកទីទួលមានសុវត្ថិភាព ពិសេសប្រុងប្រយ័ត្នចំពោះកុមារតូចៗ និងរក្សាអនាម័យឱ្យបានត្រឹមត្រូវ។

លោកស្រី បានឲ្យក្រុមការងារ អាជ្ញាធរមូលដ្ឋាន កម្លាំងនគរបាល កងរាជអាវុធហត្ថ និងកម្លាំងយោធា ត្រៀមកម្លាំង និងសម្ភារៈ ទូក រថយន្ត ស្បៀង និង ទីជម្រកស្នាក់នៅបណ្ដោះអាសន្ននៅទីទួលមានសុវត្ថិភាពជូនប្រជាពររដ្ឋផងដែរ។

ចាប់តាំងពីយប់ថ្ងៃទី១៤ ខែតុលា ឆ្នាំ២០២១ រហូតមកដល់ល្ងាចថ្ងៃទី១៥ ខែតុលា ឆ្នាំ២០២១ គេនៅសង្កេតឃើញផ្ទៃមេឃខ្មៅស្រអាប់ ពោរពេញទៅដោយគ្រាប់ភ្លៀងតូចធំ ធ្លាក់ចុះមកលើក្រុងប៉ៃលិន កាន់តែខ្លាំងឡើងៗ ធ្វើឱ្យទឹកស្ទឹងបរយ៉ាខា ស្ទុះឡើងគួរឱ្យព្រួយបាម្ភ កំពុងហូរ ត្របាញ់ គំហុកក្នុងទិសដៅពីត្បូងទៅជើងនៃខេត្ត៕